Тадар сарыннар

Эрке чаштығ темисте

Эрке чаштығ темисте

Эштенип чӧрген арғыжым.

Оғлан чаштығ темисте

Улуғлап-келип қаттышқан арғыжым.

Алтын меениң позағамны

Адалап-келип алтап киргенде,

Қайде ӱргӱнмечең мен полғам,

Қайде сыйлап кӧрбечең полғам?!

Ат пажынның алтыннаң артық

Меениң сен арғыжым.

Адалап-келген алып келгенде,

Қайде ӱргӱнмечең мен полғам?!

Қорту палық мен пеедим

Қорту палық мен пеедим —

Таш алтынға чадарға?

Алабуға палық мен пеедим —

Оймаққа туруп ойнарға?

Кӱскӱс палық мен пеедим —

Терен кӧнӱге турарға?

Пеллер палық мен пеедим —

Терен кӧнӱге турарға?

Қоора палық мен пеедим

Артығ соонға турарға?

Серкиде тӱшсем — сенегеш,

Одура тӱшсем — оймағаш.

Қартыға қуштуң уйазы

Қартыға қуштуң уйазы

Қадың қайа пажында.

Меең чабалдың чадыйы

Қадың закон қолунда.

Челтреп ӧскен ағажымны

Чел қаппачаң полза-че,

Мен чабалдың чадыйын

Чер паспачаң полза-че.

Қумаққа ӧскен қуба тал

Қумаққа ӧскен қуба тал —

Қубарза-да теминде.

Мен кӧӧленген қысчағаш —

Қунанза-да иштинде.

Сасқа ӧскен сарығ от —

Сарғарза-да теминде.

Мен кӧӧленген қысчағаш —

Сананза-да иштинде.

Комментарии